LAUF

Aðalfundur LAUF - félags flogaveikra verður haldinn mánudagskvöldið 14. maí næstkomandi kl.20 í sal á jarðhæð (kaffistofu) í Hátúni 10b.

Dagskrá:

Venjuleg aðalfundarstörf.

Okkur vantar einn frambjóðanda í varastjórn, aðrir stjórnarmenn gefa kost á sér til áframhaldandi setu.

Að loknum venjulegum aðalfundarstörfum verður boðið upp á kaffiveitingar og við gefum okkur tíma til að spjalla og njóta samverunnar á þessum síðasta fundi okkar fyrir sumarfrí.

Félagsmenn fjölmennið!

Góðir félagar!

Ég vil minna á 1.maí gönguna og hvetja alla, sem mögulega geta, að taka þátt og sýna stjórnvöldum að við látum ekki kúga okkur lengur.

Skerðingar síðustu ára, hvort heldur sem um er að ræða örorkulífeyri, uppbætur fyrir lyf og lækniskostnað, eða viðmið til að fá félagslegar bætur, þar með taldar húsaleigubætur, hafa ekki verið lagfærðar og ekki einu sinni lögð fram áætlun um hvernig skuli færa til baka það sem af hefur verið skorið, eins og alþjóðlegir mannréttindasáttmálar gera þó ráð fyrir. Á sama tíma hafa alþingismenn fengið sínar skerðingar bættar afturvirkt. Lög sem kváðu á um að lífeyrir almannatrygginga skyldi hækka miðað við verðlag eða almenn laun voru afnumin 1.janúar 2009 og hafa ekki komið til framkvæmda síðan.

Það er sama hvert litið er öryrkjar, fatlaðir og langveikir hafa þurft að greiða fyrir óráðsíu stjórnvalda síðustu áratuga og ekki sjónmáli að þeim verði bættur skaðinn á nokkurn hátt.

Ég hvet alla sem mögulega eiga þess kost að koma í gönguna, sem leggur af stað frá Hlemmi kl.13,30. Við munum hittast á bílaplaninu ofan við Hlemm kl.13,00 og þar getur fólk fengið spjöld með slagorðum eða fána ÖBÍ, auk þess verða tveir borðar til taks sem á stendur: "Ekkert um okkur án Okkar" og "Eitt samfélag fyrir alla". Einnig verða barmmerki með ýmsum áletrunum, sem kjörið er að gefa og vekja þannig umræður við fólk.

Tökum með okkur vini og ættingja og gerum okkur gildandi þennan dag (og alla aðra daga!).

EKKERT UM OKKUR ÁN OKKAR!

Með baráttukveðjum

Guðmundur Magnússon

formaður Öryrkjabandalags Íslands

Minnum aftur á happdrættismiðana sem Hrossarækt.is er að selja til styrktar félaginu okkar (sjá nánar í frétt hér fyrir neðan). Miðarnir kosta kr.1000 og eru til sölu á skrifstofu félagsins og hjá eftirfarandi verslunum: Ástund Austurveri, Líflandi Lynghálsi, Hestum og Mönnum við Ögurhvarf og hjá Baldvin og Þorvaldi á Selfossi.

Tryggingastofnun boðar til funda á Vesturlandi um lífeyrismál og þjónustu sína. Fundirnir verða haldnir þriðjudaginn 24.apríl.

-Akranes, Kirkjubraut 40 kl.11

-Borgarnes, Hjálmaklettur sal Menntaskólans kl.15

Allir velkomnir!

Hrossarækt.is styrkir LAUF - félag flogaveikra með sölu happdrættismiða þar sem í boði eru fjölmargir stórglæsilegir vinningar, mest svokallaðir folatollar. Miðinn kostar kr.1000 og rennur andvirði seldra miða óskipt til styrktar félaginu. Hvetjum við alla til að kaupa sér miða, en þá má fá hjá eftirfarandi verslunum: Ástund Austurveri, Líflandi Lynghálsi, Hestum og mönnum við Ögurhvarf og hjá Baldvin og Þorvaldi á Selfossi. Auk þessa má fá miða á skrifstofu LAUF. Kunnum við Hrossaræktarmönnum innilegar þakkir fyrir stuðninginn.

Við viljum minna á fræðslufundinn í kvöld, þann 16.apríl. Fulltrúar frá Öryggismiðstöðinni, Securitas og MedicAlert ætla að kynna þau úrræði sem þau bjóða til að auka öryggi sjúklinga. Fundurinn er haldinn í kaffistofunni á jarðhæðinni í Hátúni 10b, klukkan 20. Vonumst til að sjá sem flesta.

Tryggingastofnun ríkisins heldur fræðslufund um lífeyrismál og þjónustu stofnunarinnar föstudaginn 13.apríl kl.16 að Miðvangi 6, Egilsstöðum. Allir velkomnir.

Bergmál, sem er líknarfélag með aðsetur á Sólheimum í Grímsnesi langar að bjóða 13 hjónum/foreldrum sem eiga langveikt barn/börn til sín eina langa helgi í sumar. Í boði eru lúxusherbergi með sérbaði og sjónvarpi í hverju herbergi. Það er fullt fæði innifalið í þessu huggulega boði þeirra hjá Bergmáli. Þau eru búin að vera með þessa starfsemi í 20 ár og alltaf boðið langveiku fólki til sín endurgjaldslaust. Allir sem koma að þessu vinna allt í sjálfboðavinnu. Um er að ræða 6 til 7 herbergi. Athugið að þetta er ekki fyrir börnin, þetta er eingöngu fyrir foreldrana sér til heilsubótar og hvíldar. Það eru tvær helgar í boði, sú fyrri fimmtudaginn 5.júlí til sunnudagsins 8.júlí og sú seinni er frá 2.ágúst til 5.ágúst. Því miður er umhugsunartíminn mjög stuttur. Þeir sem hafa áhuga á að nýta sér þetta kostaboð eru vinsamlega beðnir um að hafa samband með tölvupósti á umhyggja@umhyggja.is eða hafa samband við skrifstofu Umhyggju fyrir 10.apríl n.k.

LAUF heldur opinn fræðslufund mánudagskvöldið 16.apríl næstkomandi (viku eftir páska). Umfjöllunarefnið verður öryggismál. Gestir fundarins verða fulltrúar frá Securitas, Öryggismiðstöðinni og MedicAlert. Þau munu kynna þær vörur og þjónustu sem þau bjóða upp á til að auka öryggi sjúklinga. Fréttabréf með nánari upplýsingum verður sent út þegar nær dregur.

Þroskahjálp á Suðurlandi býður félagsmönnum í Þroskahjálp, Umhyggju, Öryrkjabandalagi og hliðstæðum samtökum að leigja orlofshús á Suðurlandi. Enn eru nokkrar vikur lausar í sumar. Hafið samband við skrifstofu LAUF í netfang lauf@vortex.is og fáið sendar nánari upplýsingar, eða hringið í umsjónarmann hússins, Sigurborgu Ólafsdóttur, í síma 486-5537 / 866-1354.

LAUF - félag flogaveikra er aðili að Umhyggju - félagi til stuðnings langveikum börnum. Umhyggja rekur nokkur sumarhús til afnota fyrir fjölskyldur langveikra barna. Frestur til að sækja um sumarleigu í sumarhúsum Umhyggju í Brekkuskógi og Vaðlaborgum rennur út 10. mars n.k. Þeir sem hafa áhuga vinsamlega sendið fyrirspurnir á skrifstofu félagsins með tölvupósti umhyggja@umhyggja.is og þá munu verða send umsóknareyðublöð um hæl. Húsin eru leigð frá föstudegi til föstudags og kostar vikan 25.000 kr. Einnig viljum við benda á heimasíðu félagsins www.umhyggja.is þar sem þið getið skoðað húsin nánar. Hvetjum við félagsmenn LAUF - félags flogaveikra að nýta sér þessa þjónustu.

Við hjá LAUF höfum að undanförnu beint sjónum að flogaveiki hjá eldra fólki. Í fyrra kom út bæklingur um þetta efni og í LAUF blaðinu sem út kom rétt fyrir jólin var stórt viðtal við Sverri Bergmann taugalækni og eldri borgara um m.a. þetta málefni. Við vorum líka búin að semja við Sverri um að halda fyrir okkur fræðslufyrirlestur um þessi mál á fundi nú í lok febrúar. Sverrir lést skyndilega nú nýverið og því verður ekki af þeim fundi. Við hjá LAUF sendum fjölskyldu Sverris, samstarfsfólki og öðrum aðstandendum innilegar samúðarkveðjur og þökkum honum samstarfið.